Gyda diwedd y flwyddyn dreth yn prysur agosau a gyda newidiadau treth posib ar y gweill gyda Datganiad y Gwanwyn gan y Canghellor ar 26 Mawrth, dyma rhai faterion i chi ystyried cyn diwedd y flwyddyn dreth:
- Taliadau bonws - ydych chi'n rhagweld byddwch yn derbyn bonws mawr wrth eich cyflogwr cyn diwedd y flwyddyn dreth? Os felly, dylech chi wirio os bydd y bonws yn golygu bydd cyfanswm eich incwm yn croesi trothwy treth uwch, neu yn croesi trothwy i orfod ad-dalu budd-dal plant.
Os bydd y bonws yn codi cyfanswm eich incwm dros £50,270, byddwch yn talu peth treth incwm ar 40%. Os bydd cyfanswm eich incwm, gyda'r bonws, rhwng £100,000 a £125,140, efallai byddwch yn talu treth incwm ar 60%(!) ar rywfaint o'ch incwm.
Mae modd lleihau'r faich treth mewn rhai amgylchiadau, trwy opsiynau megis taliadau pensiwn personol neu rhoddion elusennol, ond mae angen cwblhau unrhyw daliadau fel hyn cyn 5 Ebrill 2025. - Rhoddion - ydych chi'n bwriadu gwneud unrhyw rhoddion ariannol i aelodau o'r teulu? Gallwch roi hyd at £3,000 bob blwyddyn dreth bydd wedi'i heithrio rhag treth etifeddiaeth. Hefyd, os nad ydych wedi defnyddio lwfans £3,000 y flwyddyn blaenorol, mae modd cario'r lwfans yma ymlaen hyd at un blwyddyn treth yn unig.
- Cyfrifon Cynilo Unigol (ISAs) - ydych chi wedi defnyddio eich lwfans ISA di-dreth o £20,000 yn llawn eleni? Mae cyfraddau llog uwch ar gynilion yn golygu bod nifer yn derbyn llog sy'n fwy na'r lwfans di-dreth (sef £1,000 ar gyfer trethdalwyr cyfradd sylfaenol a £500 ar gyfer trethdalwyr cyfradd uwch).
Gwiriwch gyda'ch priod/partner os ydynt wedi defnyddio ei lwfans blynyddol a chofiwch bod eich plant hefyd yn derbyn lwfans ISA ar wahân o £9,000 y flwyddyn. - Lwfans priodas - gall pâr priod/partneriaeth sifil arbed hyd at £252 o dreth incwm bob blwyddyn os yw un partner yn ennill llai na £12,570 ac os yw'r partner arall yn drethdalwr cyfradd sylfaenol (h.y. incwm blynyddol o dan £50,270). Mae'r Swyddfa Dreth yn nodi gall mwy na 2 miliwn o barau fod yn gymwys i hawlio 'lwfans priodas'. Gwiriwch os ydych yn gymwys ar wefan Gov.uk.
- Gwerthu asedau - cofiwch gwnaeth cyfraddau treth ar eiddo newid ym mis Hydref 2024 ar gyfer gwerthiant pob ased (oni bai am gwerthiant tai preswyl). O 30 Hydref 2024 ymlaen, cododd cyfraddau treth ar werthiant asedau o 10%/20% i 18%/24%.
Cofiwch felly, wrth asesu'ch bil treth am eleni, os ydych chi wedi gwerthu asedau megis cyfranddaliadau yn ystod y flwyddyn, bydd angen defnyddio cyfraddau treth gwahanol, gan ddibynnu ar ddyddiad y gwerthiant. (Dyw hyn ddim yn effeithio ar werthiant tai preswyl.)
Cysylltwch os hoffech drafod unrhyw fater cyn diwedd y flwyddyn dreth.
