- Am haf o wres! Wrth i ni agosáu at yr hydref, dyma cwpl o ddatblygiadau ym maes biliau ynni:
i. Bydd TAW yn cael ei ddileu ar filiau trydan o 1 Hydref 2026 (arbediad blynyddol o tua £45);
ii. Mae Ofgem wedi cyhoeddi bydd y cap pris ynni yn codi 4% ym mis Hydref, gan ychwanegu £60 at gostau ynni blynyddol.
Daliwch ati i geisio dod o hyd i'r cytundebau gorau ar gyfer eich costau ynni!
- Mae'r Llywodraeth wedi lansio ymgynghoriad i newid cyfreithiau etifeddu ar gyfer rheini sy'n cyd-fyw ond heb briodi. Ar hyn o bryd, os bydd un partner mewn cwpl di-briod sy'n cyd-fyw yn marw heb adael ewyllys ddilys, nid oes gan y partner sy'n goroesi hawl awtomatig i etifeddu o'u hystâd.
Y bwriad yw i gael "model clir a syml", lle mae pobl sy'n cyd-fyw (manylion i'w cadarnhau), yn derbyn yr un hawliau â pharau priod/partneriaid sifil. Yn y cyfamser, os ydych chi'n cyd-fyw, sicrhewch fod gennych ewyllys ddilys er mwyn sicrhau bod eich ystâd yn cael ei ddosbarthu yn ôl eich dymuniad.
Cwestiynau Huw ac Aled
C: Aeth fy nai i drafferthion ariannol yn ddiweddar, felly penderfynais benthyg arian iddo er mwyn iddo allu talu ei ddyledion, ar yr amod y byddai yn fy nhalu yn ôl yn llawn dros yr ychydig o flynyddoedd nesaf. Roedd e'n ddiolchgar iawn am y cymorth, felly cytunwyd ar yr holl delerau ar lafar. Ar ôl dim ond ychydig fisoedd, ac yn hollol annisgwyl, mae wedi atal ei daliadau misol i mi, ac wedi dweud wrthyf nad yw'n bwriadu ad-dalu'r gweddill. Beth yw fy hawliau yma, a beth alla i ei wneud? Rwyf bellach yn teimlo fel ffŵl am gynnig ei helpu yn y lle cyntaf.
A: Dyma sefyllfa anodd, ac un sydd, wrth reswm, yn peri gofid i chi. Os byddech chi wedi trefnu ac arwyddo cytundeb ffurfiol cyn benthyg yr arian, byddai hynny wedi gwneud gwahaniaeth enfawr. Y cam cyntaf yw i feddwl yn ôl i'r adeg y gwnaethoch chi roi'r arian i'ch nai yn wreiddiol. Pa delerau manwl y cytunwyd arnynt, ac a oes unrhyw dystiolaeth ysgrifenedig o hyn, fel e-bost neu neges destun, a fyddai'n helpu i ddangos yr hyn a gytunwyd ar y pryd?
Os nad oes modd trafod ymhellach gyda'ch nai, dylech gysylltu â'ch cyfreithiwr i weld pa opsiynau cyfreithiol sydd ar gael. Gall yr opsiynau hyn gynnwys mynd i'r llys i adennill y ddyled, neu os yw'r swm sy'n ddyledus yn fwy na £5,000, efallai y byddwch chi'n gallu cyflwyno 'galw statudol' ('statutory demand') ar eich nai. Lle mae arian yn ddyledus rhwng aelodau'r teulu, mae'n synhwyrol i chi geisio dod i benderfyniad cyfeillgar cyn cychwyn achos cyfreithiol.
Mae'r wers yn un syml: pryd bynnag y byddwch chi'n benthyca arian i deulu neu ffrindiau, faint bynnag yr ydych chi'n ymddiried ynddynt, gwnewch yn siŵr bod telerau'r cytundeb wedi'u nodi'n glir ar bapur.
